އަޙްމަދު ޢަޠޫފު މުޙައްމަދު – 12ބީ (2024)
بِسْمِ ٱللَّهِ ٱلرَّحْمَـٰنِ ٱلرَّحِيمِ.
ٱلْحَمْدُ لِلَّهِ رَبِّ ٱلْعَـٰلَمِينَ، وَٱلصَّلاَةُ وَٱلسَّلَامُ عَلَى اَشْرَفِ ٱلْأَنْبِيَاءِ وَٱلْمُرْسَلِيْنَ، وَعَلَى اٰلِهِ وَصَحْبِهِ اَجْمَعِيْنَ.
ޖަލާލުއްދީން ސްކޫލުގެ ޕްރިންސިޕަލް އަލްފާޟިލާ އާމިނަތު މުޙައްމަދު، ޑެޕިއުޓީ ޕްރިންސިޕަލް އަލްފާޟިލް އަޙްމަދު ނިޔާޒް، ސްކޫލުގެ ހީވާގީ ސީނިއަރ މެނޭޖްމަންޓް ޓީމް، ސްކޫލުގެ ޕީ.ޓީ.އޭގެ ހިންގުންތެރި މެމްބަރުން، ލީޑިންގ ޓީޗަރުން، މުދައްރިސުން، އަޅުގަނޑެކޭ އެއްފަދައިން މި ސްކޫލުގައި ތަޢުލީމު ޙާޞިލްކުރަމުންދާ އެކުވެރި ދަރިވަރުން އަދި އެ ދަރިވަރުންގެ ބެލެނިވެރިން.
ٱلسَّلَامُ عَلَيْكُمْ وَرَحْمَةُ ٱللهِ وَبَرَكَاتُهُ.
އަޅުގަނޑުމެންގެ މި ދިވެހި މުޖުތަމަޢުގައި ވަކިވަކި އަދަބުތަކަކާއި އުޞޫލުތަކެއް އޮންނަންޖެހޭ ކަމަށް ހުރިހާ ބޭފުޅުންވެސް ޤަބޫލުކުރައްވާނެކަން ޔަޤީން. ނަމަވެސް މި އަދަބުތަކާއި އުޞޫލުތަކަށް ޢަމަލުކުރާ މަންޒަރު ވަރަށް މަދުން ނޫނީ ނުފެނޭ. ޚާއްޞަކޮށް ރިވެތި އަޚްލާޤެއްގެ މަތީގައި ދެމިތިބޭ ވަރަށް މަދު ބަޔަކު ނޫނީ ނުފެންނަކަން ވަރަށް ހިތާމައާއެކު ފާހަގަކުރަން. އެހެންކަމުން އަޅުގަނޑު ވާހަކަދައްކާނީ ”ރިވެތި އަޚްލާޤުގެ މުޙިންމުކަމާއި މި ސިފަ އަޅުގަނޑުމެންގެ މުޖުތަމަޢުގައި އޮތް މިންވަރު“ މި މައުޟޫޢަށް.
އާދެ! ޝައްކެއްވެސް ނެތް. ރިވެތި އަޚްލާޤަކީ އަޅުގަނޑުމެން އެންމެންވެސް އަށަގަންނަންޖެހޭ ވަރަށް މުޙިންމު ސިފައެއް. އެގޮތުން މާތް ﷲ ރުއްސުންލެއްވި އަބޫ ޙުރައިރާގެ އަރިހުން ރިވާވެގެންވާ ޙަދީޘް ބަސްފުޅެއްގެ މާނައިގައި މިކަން ވަރަށް ޞަރީޙަކޮށް ބަޔާންކޮށްދެއްވާފައިވޭ. އެ ޙަދީޘް ބަސްފުޅުގެ މާނައިގައި ވަނީ ”މުއުމިނުންކުރެ އެބައެއްގެ އީމާންކަން އެންމެ ފުރިހަމަ ބަޔަކީ، އެބައެއްގެ އަޚްލާޤު އެންމެ ހެޔޮ ބައެކެވެ.“ މި ބަސްފުޅުން އަޅުގަނޑުމެންނަށް އެނގެނީ ރިވެތި އަޚްލާޤަކީ އެކަމުގެ ސަބަބުން ހެޔޮކަމުގެ ތިލަފަތް ބަރުކޮށްދޭ ޢަމަލެއްކަން. އަދި ރިވެތި އަޚްލާޤާ ނުލައި އަޅުގަނޑުމެންގެ އީމާންތެރިކަން ފުރިހަމަ ނުވާނެކަން ވެސް މި ބަސްފުޅުން އެބަ ދޭހަވޭ. އެހެންނޫންތޯ؟ އެހެންކަމުން އަޅުގަނޑު ދަންނަވާލަން ބޭނުންވަނީ ރިވެތި އަޚްލާޤު އަށަގަތުމަކީ އަޅުގަނޑުމެން އެންމެންނަށް ވެސް ވަރަށް މުޙިންމު ކަމެކޭ.
ދެން ބަލާލަމާ ޢާންމުންގެ ތެރޭގައި މި ސިފަ އޮތް މިންވަރަށް. އެގޮތުން ސްކޫލުގައި މުދައްރިސުން ކިޔަވައި ދެއްވާ ވަގުތުގައި ކުދިން ސަކަރާތްޖަހާ މަންޒަރަކީ މި ދުވަސްވަރު ވަރަށް ޢާންމުކޮށް ފެންނަ މަންޒަރެއް. އަދި އެ ހިސާބުން ނިމުނީކީ ނޫނޭ! މުދައްރިސް ބުނުއްވާ އެއްޗެހީގެ ބަދަލަށް ވެސް ކުދިން ވާހަކަ ދައްކައޭ! އެހެންކަމުން މިއީ ރިވެތި އަޚްލާޤުގެ ސިފަ އަށަގަތުމަށް ހުރަސްއަޅާ ވަރަށް ބޮޑު ކަމެއްކަމަށް އަޅުގަނޑު ޤަބޫލުކުރަން.
އާދެ! ދެން އޮތީ މައިންބަފައިންނަށް ކަމޭހިތުން. މައިބަފައިންނަށް ކަމޭހިތުމަކީ ރިވެތި އަޚްލާޤުގެ ތެރޭގައި ހިމެނޭ ވަރަށް އަޢުލާކަން ބޮޑު ޢަމަލެއް. އެހެންނޫންތޯ؟ އެކަމަކު މިހާރަކަށް އައިސް އަޅުގަނޑުމެންނަށް ފެންނަނީ ދަރިން މައިންބަފައިންނާ ދިމާލަށް އޭތިމީތި ގޮވައި ބޭނުންހާ އެއްޗެއް ކިޔާ މަންޒަރު. މިއީ ރިވެތި އަޚްލާޤުގެ ސިފަ ނެތިދިއުމަށް ދިމާވާ ވަރަށް ބޮޑު މައްސަލައެއް. އެހެންކަމުން މައިންބަފައިންނަށް ކަމޭނުހިތައި، އެބައިމީހުންނަށް އިޙްތިރާމް ނުކުރުމުން ރިވެތި އަޚްލާޤުގެ ޞިފައަށް ހީނަރުކަން ލިބުމަކީ ވުން ވަރަށް ގާތުގައިވާ ކަމެއް.
ޝައްކެއްވެސް ނެތްގޮތުގައި ރިވެތި އަޚްލާޤަކީ އަޅުގަނޑުމެން އަށަގަންނަންޖެހޭ ވަރަށްވެސް މުޙިންމު ޞިފައެއް. އެހެންކަމުން އަޅުގަނޑު އުންމީދުކުރަނީ އަޅުގަނޑު މި ދިން މަޢުލޫމާތުގެ އަލީގައި ތިޔަ އެންމެހޭ ބޭފުޅުން ވެސް ޢިބުރަތް ޙާޞިލްކުރާނެކަމަށް. އަޅުގަނޑުގެ ދުޢާއަކީ މި ސްކޫލަށާއި ދިވެހި މުޖުތަމަޢުއަށް އަދަށްވުރެ ފަހި މާދަމާއެއް މިންވަރު ކޮށްދެއްވުން.
އާމީން.
وَٱلسَّلَامُ عَلَيْكُمْ وَرَحْمَةُ ٱللهِ وَبَرَكَاتُهُ.