އާއިލާއެކު ކެއުމަކަށް އިންޞާފުކޮށްލަން ރެސްޓޯރެންޓަކަށް ދިޔަ ދުވަހު، ދަރިން އެ އުޅުނު ގޮތުން އަޖައިބުވެ އަންތަރީސްވާވަރު ވިއެވެ. ”އެކަކުވެސް ކާންނުފަށާތި، ސްނެޕްކޮށްލައި، އިންސްޓަގްރާމް ސްޓޯރީއަށް ލާނޭ ފޮޓޯއެއް ނެގެންދެން އިހަށް ތިބޭ!“ ގޮނޑިމައްޗަށް ކޮޅަށްއަރައި، ފޮޓޯނަގަން ހުރެފައި، އަހަރެންގެ ސޯޅަ އަހަރަށްދާ އަންހެންދަރި ބުންޏެވެ. ވަށައިގެން ނަޒަރު ހިންގާލުމުން މުޅިންވެސް ފެނުނީ އެ ޒާތުގެ މަންޒަރުތަކެވެ.
ހަމައެކަނި ކާއެއްޗެހި ފޮޓޯނަގައި މީސްމީޑިއާއަށް ދޫކުރުމަކުން ނިމުނީއެއް ނޫނެވެ. ކެއުމުގެ ތެރޭގައިވެސް އެކަކު އަނެކަކާ ވާހަކަދެއްކޭވަރެއް ނުވިއެވެ. އެކަކު އިނީ އޭނާ ފޭސްބުކަށް ލީ ފޮޓޯއަށް ލިބޭ ”ލައިކް“ ގުނާށެވެ. އަނެކަކު އިނީ ސްނެޕްގްރޫޕުގައި، އޭނާގެ ”ދުރުގައި ތިބި ރައްޓެހިންނާ“ ވާހަކަދައްކާށެވެ.
މިއީ މިއަދުގެ މުޖުތަމައުން ވަރަށް އާންމުކޮށް ފެންނަމުންދާ، އެހެނަސް ގަބޫލުކުރަން ދަތި ހިތި ޙަޤީޤަތެކެވެ. މީސްމީޑިއާގެ އަވައިގައި ޖެހި ކައިރީގައި ގާތް މީހުން އެއީ ޙަޤީޤަތުގައި ދުރު، ބީރައްޓެހި ބަޔަކަށް ވެއްޖެއެވެ. ”އަހަރެމެން މިއަދު ތިބީ އެއް މޭޒެއްގެ ދެފަރާތުގައި ކަމަށްވިޔަސް، ހަގީގަތުގައި ތިބީ އެކި ދުނިޔެތަކުގައި“ އިޖުތިމާޢީ މައްސަލަތައް ދިރާސާކުރާ ބޭފުޅަކު ވިދާޅުވިއެވެ. އާއިލީ ސުފުރާތަކާއި، އެކުވެރިންގެ އެއްވުންތަކަކީ އެކަކު އަނެކަކުގެ ހާލުބަލައި، އުފަލާއި ހިތާމަ ހިއްސާކުރާ ވަގުތުތަކަކަށް ވުމުގެ ބަދަލުގައި، މިއަދު އެއީ މީސްމީޑިއާއަށް ”ކޮންޓެންޓް“ އުފައްދާ މައިދާނަކަށް ވަނީ ބަދަލުވެފައެވެ.
މީސްމީޑިއާގެ މަންސަތަކުން ލިބޭ ”ލައިކް“ ތަކާއި ”ކޮމެންޓް“ ތަކަކީ އިންސާނާގެ ނަފްސާނީ ހަމަޖެހުމާއި އުފާވެރިކަން މިންކުރާ މިންގަނޑަކަށް ހެދުމުގެ ނަތީޖާއަކީ، ހަގީގީ ދުނިޔޭގައި ލިބޭ އުފާތަކަށް ދެވޭ ސަމާލުކަން ކުޑަވުމެވެ. ”ގިނަ މީހުންގެ ސަމާލުކަން މުޅިން ހުންނަނީ ފޯނުގެ ސްކްރީނަށް، ކުރިމަތީގައި ތިބި އާއިލާގެ މޫނުތަކަކަށް ނޫން“ މިއީ މިއަދުގެ ގިނަ ޒުވާނުންގެ ހާލަތު އަމިއްލައަށް ގަބޫލުކުރާ ގޮތެވެ. ޒުވާނުންނާއި ކުޑަކުދިންގެ ހާއްސަ އިހުސާސްތައް މިއަދު ގުޅިފައިވަނީ ސްކްރީނުގެ ފަހަތުގައި ތިބި އޭނާ ނުވެސް ދަންނަ އެތައް ބަޔަކު ދޭ ތައުރީފާއެވެ. މީގެ ސަބަބުން، ކުރިމަތީގައި ތިބި މައިންބަފައިންނާއި، ދަރިންނާއި، ދެމަފިރިންގެ މެދުގައި އޮންނަންޖެހޭ ޚާއްޞަ ލޯތްބާއި ގުޅުން ދަނީ ދުވަހުން ދުވަހަށް ހީނަރުވަމުންނެވެ.
”މީސްމީޑިއާއަށް ދެވިހިފުމަކީ އާއިލީ ގުޅުންތައް ހީނަރުވެ، ދަރިންގެ މުއާމަލާތްކުރުމުގެ ހުނަރު ކުޑަކޮށްދޭ ކަމެއް“ ނަފްސާނީ ޢިލްމުވެރިއަކު އޭނާގެ ރައުޔު ފާޅުކުރަމުން ބުންޏެވެ. މި ފަދަ އާދަތަކުގެ ސަބަބުން ކުޑަކުދިންގެ އިޖުތިމާއީ ތަރައްގީއަށް ބޮޑެތި ހުރަސްތަކެއް ކުރިމަތިވެއެވެ. މީސްމީޑިއަށް ދެވިހިފާފައި ތިބޭ ކުދިންގެ ފަރާތުން ފާހަގަވަނީ މޫނަށް ބަލައިގެން ވާހަކަދެއްކުމާއި، މީހުންގެ އިހުސާސްތައް ދެނެގަތުމުގެ ގާބިލުކަން ކުޑަވެ، އެކަނިވެރިކަމުގެ އިހުސާސްކުރެވޭ މިންވަރު އިތުރުވާކަމެވެ. ވަގުތީ އުފަލަކަށްޓަކައި މީސްމީޑިއާގައި ކުރާ ޕޯސްޓްތަކުގެ ފަހަތުން ދުވާއިރު، އަހަރެމެންގެ އަތުން ބީވެގެން މިދަނީ އެނބުރި ނުލިބޭނެ އަގުހުރި ވަގުތުތަކެވެ. އާއިލާއާއެކު ހޭދަކުރެވޭ އުފާވެރި ހަނދާންތަކުގެ ބަދަލުގައި، އާޚިރުގައި އެކަކު އަނެކަކަށް ދެނެގަނެވޭނީ ސްކްރީނުން ފެންނަ ނަގުލީ ތަސްވީރެކެވެ.
”ފޯނު ނިއްވާލުމަކީ އުނދަގޫ ކަމެއް އެހެނަސް އެއީ އާއިލާއަށް ސަމާލުކަން ދޭން ކުރަންޖެހޭ މުހިންމުކަމެއް“ ދިރިއުޅުމުގެ އާދަކާދަތައް ބައްޓަންކުރުމާ ގުޅޭ ގޮތުން ވާހަކަދައްކަމުން ވަސޭހަތްތެރިއަކު ފާހަގަކުރިއެވެ. މި ނުރައްކާތެރި ހާލަތުން އަރައިގަތުމަށްޓަކައި އަހަރެމެންގެ އަމަލީ ދިރިއުޅުމަށް އަވަސް ބަދަލުތަކެއް ގެންނަންޖެހެއެވެ. ކާންއިށީންނަ ވަގުތުތަކާއި، އާއިލީ އެއްވުންތަކުގައި ފޯނު ބޭނުންނުކުރާނެ ސަރަހައްދުތަކާއި ވަގުތުތައް ކަނޑައެޅުން މުހިންމެވެ. މީސްމީޑިއާގެ ވަސްވާސްތަކުން ދުރުވެ، ކުރިމަތީގައި ތިބި އާއިލާގެ މެންބަރުންގެ ވާހަކަތަކަށް އަޑުއަހައި، އެމީހުންގެ އިހުސާސްތަކުގައި ބައިވެރިވުމަކީ ދިރިއުޅުމަށް އުފާވެރިކަން ގެނެސްދޭނެ ކަމެކެވެ.
ހަގީގީ ދިރިއުޅުމުގެ ރީތިކަން އޮތީ ސްކްރީނުގެ އަލީގެ ތެރެއަކު ނޫނެވެ. އެއީ ކުރިމަތީގައި ތިބި އާއިލާއާއި އެކުވެރިންގެ ހިނިތުންވުމާއި، އެމީހުންނާއެކު ހޭދަކުރެވޭ ހަގީގީ ވަގުތުތަކުގައެވެ. މިއީ މީސްމީޑިއާގެ ކަސްތޮޅުއެޅުން ނެއްޓި އާއިލީ ގުޅުންތައް އާލާކުރުމަށްޓަކައި އަވަސް ފިޔަވަޅުތަކެއް އަޅަން މިއަދު މިވަނީ މަޖުބޫރުވެފައެވެ.
Leave a Reply