މަރިޔަމް ޖަނާން މުޙައްމަދު (ޖަލާލުއްދީން ސްކޫލް، 12ބީ)
ބ.ބޮލިދޫ، ފެންފިޔާޒުގޭގެ ދޮރާށިން އެތެރެވުމާއެކު ފުރަތަމަ ވެސް ލޮލުގައިއަޅައިގަތީ މެދުގޯތީގެ އެއްފަރާތެއްގައި ތަރުތީބުކޮށްފައިވާ ދަރުބޮނޑިތަކެވެ. ގެއާ އިންވެގެން ހުރި ދަރުބަދިގެއިން އޭރު ވެސް ދުވަނީ މީރު ރިހާކުރުވަހެވެ. މެދުގޯތީގައި އަވީލައިފައި ހުރި މަސްލީލިތައް ވެސް ހުރީ ކުޅުދިޔާވާ ކަހަލަ ގޮތަކަށެވެ. އަހަރެމެން ގޮވާލި ސަލާމަށް އިޖާބަދެމުން ބަދިގެ ތެރެއިން ނުކުމެ ހިނިތުންވެލީ ދެވަނަ އެހެން މީހެއް ނޫނެވެ. މުޅި ރާއްޖެއަށް މަޝްހޫރު ”ބަދިގެއިން“ ބުރޭންޑު ވުޖޫދުކުރި މުޙައްމަދު ސަލީމެވެ.
”ފުރަތަމަ ހެދީ ޓީޗިންގ، ދެން ރަށުން ވަޒީފާއެއް ނުލިބުނީމާ ބޭނުންވީ ގޭގައި ހުރެގެން ކުރެވޭނޭ ކަހަލަ މަސައްކަތެއް ކުރަން“ އޭނާގެ ދަރުބަދިގެއަށް ވަނުމަށް އަތުން އިޝާރާތްކުރަމުން، މަސައްކަތް ފެށުނު ގޮތް، 27 އަހަރުގެ ސަލީމު ކިޔައިދިނެވެ. ދިރިއުޅުމުގެ މިސްރާބު އެހެން ދިމާއަކަށް އަނބުރާލަން ޖެހޭ ވަރަށް ގިނަ ޙާލަތްތައް އަންނާނެއެވެ. ސަލީމުގެ ނަސީބަކަށްވީ އޭނާގެ އުފަން ގެއަކީ މަސްދޯންޏެއް ދުއްވާ ގެއަކަށް ވުމެވެ. އެހެންކަމުން ކައްކާނޭ މަސް ހޯދުމަށް ތަކުލީފެއް އުފުލާއަކަށް އޭނާއަކަށް ނުޖެހުނެވެ. ބައްޕައާއި ދޮށްޓަށް ތިބޭ ދެ ބޭބެއިން ގެއަށް ގެންނަ މަސްތައް ކަނޑައި ސާފުކޮށް ކެއްކުކުމުގެ ހުރިހާ މަސައްކަތަކާ ސަލީމު ހަވާލުވީ އޭނާ އަމިއްލައަށް ބޭނުންވެގެންނެވެ.
”ކުރިން ވެސް މަންމަމެން ވަރަށް ގިނައިން މަސް ދިލަޖައްސާނެ، ގޭގައި ބޭނުންކުރާވަރަށް. އެމީހުންގެ މަސައްކަތް ފެނި އެކަމުގެ ތެރޭގައި ކުރިން ވެސް ކޮންމެވެސް ވަރަކަށް އުޅެވޭ. އެ ގޮތަށް އަސްލު މި މަސައްކަތް ދަސްވީ.“ މަސައްކަތުގެ ތެރެއަށް ވަދެވުނުގޮތާއި ޚިޔާލު ލިބުނުގޮތް ކިޔައިދެމުން ޒުވާން ސަލީމު ބުންޏެވެ. މަސައްކަތުގައި އޭނާ އަބަދުވެސް ކަށަވަރު ކުރަމުން ދިޔައީ އުފައްދާ ބާވަތްތަކުގެ ފެންވަރެވެ. އެކަން އެގޮތަށް ކުރުމުގެ ނަތީޖާއަކަށްވީ އޭނާގެ ބާވަތްތަކަށް އޮތް ”ޑިމާންޑު“ ބޮޑުވުމެވެ. މިއަދު އޭނާގެ ”ބްރޭންޑް ބަދިގެއިން“ ގެ ލޭބަލު ޖެހިގެން ނުކުންނަ ވަޅޯމަހާއި، ހިކިމަހާއި، ތުނިމަހާއި، ރިހާކުރަކީ އާންމުން އެ ރަހަތަކަށް އެދިއެދި ތިބޭ ރަހަތަކަކަށް ވަނީ ވެފައެވެ.
”ރިހާކުރު ކެއްކީ އަސްލު އަޖުމަ ބަލާލަން. ފުރަތަމަ ވިއްކީ ވެސް ގާތް މީހުންނަށް. އެކަމަކު ފަހުން ފަހުން އެނގިއްޖެ ރިހާކުރުން ލިބޭ ނަފާ މާ ބޮޑަށް ވެސް އިތުރުކަން“ އުނދުންމަތީގައި އޮލަވާން ފަށާފައިހުރި ރިހާކުރު ލޯގަނޑުގެ ތެރޭގައި ދޭފަތް ހިންގާލަމުން ސަލީމު ބުންޏެވެ. އޭނާ ގަބޫލުކުރާ ގޮތުގައި މިއީ ހަޑި މަސައްކަތެއް ނޫނެވެ. އަދި ”އަންހެން“ މަސައްކަތެއް ވެސް ނޫނެވެ.
ކިޔަވައިދިނުމުގެ ދާއިރާއިން ކުރިއަށް ދިޔުމުގެ ހުވަފެން ދެކެމުން އައިސް، ހަޔާތުގެ ލަގަން އެހެން ދިމާއަކަށް ބަދަލުކޮށްލުމަށް ފަހު ޒުވާން އުމުރުގައި މަސްކައްކަން ބަދިގެއަށް ވަނުމަކީ، ސަލީމު ދެކޭގޮތުގައި އޭނާއަށް ނިންމުނު އެންމެ ރަނގަޅު ނިންމުމެވެ. ”ބަދިގެއިން“ ބްރޭންޑާއެކު މުޅި ރާއްޖެއަށް ވިދާލި ސަލީމު މިއަދު ވަނީ ދިވެހި ރަތަކުގެ އެންމެ އުހަށް ވާސިލުވެފައެވެ.